【開年飯嚐新】

同朋友、同事食開年飯，一樣要豐富！呢間喺九龍、新界都有分店，主打北京、上海同四川菜系嘅中菜館，推出5款期間限定暖心菜餚啊（葵芳店除外）～包括以梭子蟹做主角嘅荷葉香飯同粉絲煲，前者嘅米飯同蔥碎、特製醬油一齊翻炒後再吸收蟹嘅精華同荷香，味道非常有層次。而紅燒竹笙魚翅選用優質竹笙同極品魚翅，燉煮後湯底濃郁，鮮甜味美。仲有入口微麻嘅藤椒汁胭脂茄，以及煎至外皮金黃酥脆、內裡充滿肉汁嘅上海生煎包，每款都暖胃滋味呀。